A familia Xachoconto. CEIP Vilaverde (I)

Estudantes do CEIP Vilaverde de Pontevedra deixaron gravada neste podcast boa parte da súa visita a PontevedraViva Radio, enmarcada na proposta de fomento da lectura de 'A familia Xachoconto'. Un total de vinte e dous nenos e nenas de terceiro curso de Primaria (8 e 9 anos) tiveron ocasión de coñecer a redacción deste xornal dixital e igualmente a súa parte radiofónica. As diferenzas entre a radio analóxica e a radio dixital, contidos radiofónicos, quen son e que fan os técnicos de son, os locutores, os tertulianos... foron temas que se expuxeron na parte de aproximación aos medios de comunicación. Chegados á parte de promover o seu interese polos libros, a atención pasou á lectura dun extracto de 'Frei Perico e o seu borrico' de Juan Muñoz Martín; un clásico entre lectores destas idades. A parte máis lúdica estivo nun concurso, tipo pasapalabra, con preguntas relacionadas co texto escollido. Para terminar, puxeron en práctica o papel de tertulianos.