Pse Irlanda zgjat edhe 12 muaj pjesëmarrjen në KFOR?

PRISHTINË — Qeveria irlandeze ka vendosur të vazhdojë pjesëmarrjen e Forcave të Mbrojtjes në misionin paqeruajtës të NATO-s në Kosovë për edhe 12 muaj, pas qershorit 2026. Vendimi u miratua këtë javë dhe u bë i ditur sot nga ministrja e mbrojtjes Helen McEntee.

"KFOR-i është një mision i rëndësishëm ndërkombëtar që fokusohet në krijimin e një mjedisi të sigurt për qytetarët e Kosovës", tha McEntee. Ajo theksoi se misioni mbështet përpjekjet më të gjera për ndërtimin e paqes në rajon.

Që nga gushti 1999, më shumë se 3.000 pjesëtarë të Forcave të Mbrojtjes irlandeze kanë shërbyer në KFOR. McEntee vlerësoi se kontributi i tyre ka qenë i konsiderueshëm për mjedisin e sigurisë, i cili mbetet i qëndrueshëm edhe sot. Ajo falënderoi të gjithë anëtarët që kanë shërbyer për gati tre dekada.

Shefi i Shtabit të Forcave të Mbrojtjes, gjenerallejtënant Rossa Mulcahy, e mirëpriti vendimin. Ai tha se pjesëmarrja ofron përvojë operacionale të vlefshme dhe forcues bashkëpunimin me vendet partnere. "Jam jashtëzakonisht krenar për të gjithë pjesëtarët që kanë shërbyer dhe vazhdojnë të shërbejnë", shtoi ai.

Aktualisht, një kontingjent prej 13 pjesëtarësh të Forcave të Mbrojtjes irlandeze shërben në pozita të ndryshme në Shtabin e KFOR-it në Prishtinë, përfshirë oficerë të lartë e të rinj dhe nënoficerë në fusha funksionale të ndryshme.

Burim: Gazeta Express — Redaksia ZHURMA