وینزویلا کی حکومت نے جمعرات کو کہا ہے کہ ملک میں آنے والے شدید زلزلوں کے نتیجے مرنے والوں کی تعداد بڑھ کر 188 ہو گئی جبکہ تقریباً 1500 زخمی اور 200 افراد ملبے تلے پھنسے ہوئے ہیں۔

حکام کے مطابق زلزلوں سے متاثرہ علاقوں میں بنیادی ڈھانچے، ہسپتالوں اور رہائشی عمارتوں کو شدید نقصان پہنچا ہے۔

اے پی کے مطابق وینزویلا کی عبوری صدر ڈیلسی روڈریگیز بتایا کہ تعمیرِ نو کے لیے 20 کروڑ ڈالر کا ابتدائی فنڈ قائم کیا جائے گا، جس کے لیے آئی ایم ایف کے وسائل استعمال کیے جائیں گے۔ یہ فنڈ انفراسٹرکچر، ہسپتالوں اور رہائشی منصوبوں کی بحالی پر خرچ کیا جائے گا۔

روڈریگیز نے خبردار کیا کہ اموات کی تعداد میں مزید اضافے کا خدشہ ہے کیونکہ ریسکیو ٹیمیں منہدم عمارتوں میں تلاش کا عمل جاری رکھے ہوئے ہیں اور ایمرجنسی عملہ تباہ شدہ علاقوں تک پہنچ رہا ہے۔

7.2 اور 7.5 شدت کے یہ زلزلے شام چھ بجے کے کچھ دیر بعد آئے۔

امریکی جیولوجیکل سروے (یو ایس جی ایس) کے مطابق زلزلوں کا مرکز مورون نامی قصبے کے مغرب میں تھا، جو ملک کے کیریبین ساحل پر واقع ہے اور کاراکاس سے تقریباً 168 کلومیٹر مغرب میں واقع ہے۔ زلزلے کی گہرائی 22 کلومیٹر تھی۔

یو ایس جی ایس کے مطابق 7.2 شدت کے زلزلے کے صرف ایک منٹ بعد 7.5 شدت کا ایک اور زیادہ طاقت ور زلزلہ آیا۔

اے ایف پی نے بتایا کہ دوسرے زلزلے کی گہرائی 10 کلومیٹر تھی اور اس کا مرکز مورون سے 16 کلومیٹر جنوب مغرب میں واقع تھا۔

پاکستان نے وینزویلا میں بدھ کی شام آنے والے طاقت ور اور یکے بعد دیگرے زلزلوں پر اظہار افسوس کیا ہے۔

پاکستان کے وزیراعظم شہباز شریف نے ایکس پر جاری بیان میں اظہار افسوس کرتے ہوئے کہا ’پاکستان کے عوام کی جانب سے میں وینزویلا کی حکومت اور عوام، خصوصاً متاثرہ خاندانوں سے دلی تعزیت کا اظہار کرتا ہوں۔

’ہم زخمیوں کی جلد صحت یابی کے لیے دعا گو ہیں اور اس مشکل اور کٹھن وقت میں متاثرہ تمام افراد کے ساتھ یکجہتی کا اظہار کرتے ہیں۔‘

Deeply saddened by the devastation and loss of life caused by the earthquakes in Venezuela.

On behalf of the people of Pakistan, I convey our heartfelt condolences to the Government and people of Venezuela, especially the families of the victims. We pray for the injured and…

— Shehbaz Sharif (@CMShehbaz) June 25, 2026

ہنگامی حالت نافذ

روڈریگیز نے بدھ کی رات قوم سے خطاب میں ہنگامی حالت نافذ کرنے کا اعلان کرتے ہوئے بتایا زلزلوں سے کئی ریاستوں میں نقصان ہوا۔

جمعرات کی صبح جاری کیے گئے اعداد و شمار میں ریاست لا گوائرا کو شامل نہیں کیا گیا، جسے روڈریگیز نے ’تباہی زدہ‘ اور سب سے زیادہ متاثرہ علاقہ قرار دیا۔

انہوں نے کہا ’دارالحکومت کاراکاس سے تقریباً 30 کلومیٹر شمال میں واقع اس علاقے میں درجنوں عمارتیں منہدم ہو چکی ہیں اور ہم اس وقت جانیں بچانے کے لیے بھرپور ریسکیو آپریشن کر رہے ہیں۔‘

ان زلزلوں نے، جو ایک صدی سے زائد عرصے میں وینزویلا میں آنے والے طاقت ور ترین زلزلوں میں شمار کیے جا رہے ہیں، پورے خطے کو ہلا کر رکھ دیا۔

کئی شہروں میں عمارتیں خالی کروا لی گئیں جبکہ اس کے اثرات برازیل کے ایمزون کے علاقوں تک محسوس کیے گئے جو کاراکاس سے تقریباً 1700 کلومیٹر دور ہیں۔

24 جون 2026 کو وینزویلا کے دارالحکومت کاراکاس میں آنے والے زلزلے کے بعد ایک تباہ شدہ عمارت کے سامنے لوگ گزر رہے ہیں جبکہ ایک درخت گرنے سے تباہ ہونے والی گاڑی بھی تصویر میں دیکھی جا سکتی ہے (اے ایف پی)

روڈریگیز نے مزید کہا کہ کاراکاس میں میٹرو اور قدرتی گیس کی خدمات معطل کر دی گئی ہیں۔

انہوں نے وینزویلا کے شہریوں سے اپیل کی کہ وہ حکومتی ایپ کے ذریعے نقصانات کی اطلاع دیں۔

مزید پڑھ

اس سیکشن میں متعلقہ حوالہ پوائنٹس شامل ہیں (Related Nodes field)

وزیر داخلہ دیوسدادو کابیو نے کہا کہ کاراکاس کے علاقے الٹامیرا میں گھروں اور عمارتوں کے منہدم ہونے کے باعث ’تشویش ناک صورت حال‘ پیدا ہو گئی ہے۔

کئی افراد شدید صدمے کی حالت میں تھے کیونکہ عمارتوں کی پوری دیواریں گر چکی تھیں اور سڑک سے گھروں کا فرنیچر دکھائی دے رہا تھا۔

’ہم سب کو اپنے گھروں سے نکلنا پڑا‘

سورج غروب ہونے کے بعد بھی لوگ کئی گھنٹوں تک سڑکوں پر موجود رہے۔ بعض لوگ اپنے پالتو جانوروں کو گلے لگائے زمین پر بیٹھے رہے۔

منہدم عمارتوں، گرے ہوئے بجلی کے کھمبوں اور ملبے نے سڑکیں بند کر دیں۔ دارالحکومت کے بعض علاقوں میں بجلی اور موبائل فون سگنل بھی معطل ہو گئے۔

کاراکاس کے رہائشی ہیکٹر رِچی نے کہا ’پہلے ہلکے جھٹکے محسوس ہوئے، پھر شدت آہستہ آہستہ بڑھتی گئی اور آخرکار ہم سب کو اپنے گھروں سے نکل کر باہر آنا اور ایک جگہ جمع ہونا پڑا۔‘

ایک اور رہائشی روبرٹو گاماس نے کہا ’عمارت واقعی ایک طرف سے دوسری طرف ہل رہی تھی۔ یہ ناقابلِ یقین تھا۔ زلزلے کی شدت بہت زیادہ تھی۔

’ہم چل رہے تھے اور جھٹکے ہمیں ادھر اُدھر پھینک رہے تھے۔ اپارٹمنٹ کے اندر ہر چیز گر گئی۔ خدا کا شکر ہے کہ ہم باہر نکلنے میں کامیاب ہو گئے۔‘

وینزویلا کے بعض حصوں میں موبائل فون سگنل کی عدم دستیابی نے بہت سے خاندانوں کی پریشانی میں اضافہ کر دیا، خاص طور پر ان خاندانوں کی، جن کے افراد ان 77 لاکھ سے زائد لوگوں میں شامل ہیں جو ملک کے طویل بحران کے دوران وینزویلا چھوڑ چکے ہیں۔

دسمبر میں وینزویلا چھوڑنے کے بعد جلاوطنی اختیار کرنے والی اپوزیشن رہنما ماریا کورینا ماچاڈو نے ایکس پر پیغام جاری کرتے ہوئے وینزویلا کے عوام کے لیے دعا اور نیک خواہشات کا اظہار کیا۔

انہوں نے ایکس پر لکھا ’اس مشکل وقت میں ہمارے درمیان طاقت، سکون اور یکجہتی قائم رہے۔‘

24 جون 2026 کو وینزویلا کے دارالحکومت کاراکاس میں آنے والے زلزلے کے بعد لوگ سڑکوں پر موجود ہیں (اے ایف پی)

وینزویلا سے اظہارِ یکجہتی

وینزویلا میں آنے والے شدید زلزلوں کے بعد سماجی رابطوں کی ویب سائٹس پر فوری ردعمل سامنے آیا اور امریکہ، چلی اور ایل سلواڈور سمیت مختلف حکومتوں نے مدد کی پیشکش کی۔

امریکی نائب وزیر خارجہ کرسٹوفر لینڈاؤ نے ایکس پر کہا ’امریکہ آج شام آنے والے تباہ کن زلزلوں کے بعد وینزویلا کے عوام کے ساتھ کھڑا ہے۔

’ہم حکام سے رابطے میں ہیں اور امدادی سرگرمیوں کو متحرک کر رہے ہیں۔‘

ایل سلواڈور کے صدر نایب بوکیلے نے، جو ماضی میں وینزویلا کی حکومت کے سخت مخالف رہے ہیں، بدھ کی رات ایکس پر جاری بیان میں امداد کی پیشکش کی۔

انہوں نے لکھا ’ہم اپنی مکمل یکجہتی اور دعائیں آپ کے ساتھ بھیجتے ہیں۔ مضبوط رہیں، وینزویلا۔‘

ایکواڈور کے صدر ڈینیئل نوبوا نے وینزویلا کے عوام سے یکجہتی کا اظہار کرتے ہوئے کہا انہوں نے ہنگامی صورت حال سے نمٹنے کے لیے فوری انسانی امداد بھیجنے کا حکم دیا ہے۔

انہوں نے لکھا ’ایکواڈور اس وقت کے تقاضوں کے مطابق تیزی اور عزم کے ساتھ ردعمل دے گا کیونکہ ہمارے اختلافات کتنے ہی بڑے کیوں نہ ہوں، انسانیت کو ہمیشہ ایک رہنما کے اقدامات کی رہنمائی کرنی چاہیے۔‘

زلزلے کے اثرات پورے خطے میں محسوس کیے گئے

زلزلے کے جھٹکے کولمبیا کے کیریبین اور شمال مشرقی علاقوں میں بھی محسوس کیے گئے، تاہم وہاں کسی نقصان یا زخمی ہونے کی اطلاع نہیں ملی۔

امریکی پیسیفک سونامی وارننگ سینٹر نے زلزلوں کے بعد سونامی سے متعلق کئی انتباہ جاری کیے، جنہیں بعد میں واپس لے لیا گیا۔

وینزویلا میں شدید زلزلے غیر معمولی سمجھے جاتے ہیں۔

اگرچہ وینزویلا کئی فالٹ لائنوں کے قریب واقع ہے، تاہم جنوبی امریکی اور کیریبین ٹیکٹونک پلیٹوں کے درمیان اس کی جغرافیائی پوزیشن کے باعث یہاں لاطینی امریکہ کے دیگر حصوں کے مقابلے میں زلزلے کم آتے ہیں۔

بحرالکاہل کے ساحلی علاقوں مثلاً میکسیکو اور چلی میں زلزلے کثرت سے آتے ہیں۔

یہ دونوں ممالک ’رِنگ آف فائر‘ کہلانے والی زلزلہ خیز ٹیکٹونک پٹی پر واقع ہیں، جو امریکی جیولوجیکل سروے کے مطابق دنیا کے 90 فیصد زلزلوں کی ذمہ دار ہے۔

وینزویلا

زلزلہ

وینزویلا کی عبوری صدرنے مزید بتایا کہ ملک کی تعمیرِ نو کے لیے 20 کروڑ ڈالر کا ابتدائی فنڈ قائم کیا جائے گا، جس کے لیے آئی ایم ایف کے وسائل استعمال کیے جائیں گے۔

انڈپینڈنٹ اردو

جمعرات, جون 25, 2026 - 15:15

Main image:

25 جون 2026 کی صبح وینزویلا کی ریاست لا گوائرا کے شہر کاتیا لا مار میں زلزلے سے متاثرہ عمارتوں کے قریب مقامی رہائشی اور امدادی کارکن موجود ہیں (فیڈریکو پارا / اے ایف پی)

دنیا

type:

news

related nodes:

روس: آتش فشاں کا 600 سال بعد پھٹنا زلزلے کی وجہ ہو سکتا ہے

سمارٹ فونز سے اب زلزلے کا قبل از وقت پتہ لگایا جا سکے گا: تحقیق

’راتوں کی نیند اڑ گئی:‘ جاپانی جزیرے پر ایک ہفتے میں 900 زلزلے

افغانستان زلزلہ: اموات کی تعداد 2200 سے متجاوز، امداد جاری

SEO Title:

وینزویلا میں زلزلے سے اموات کی تعداد 188 ہو گئی، 1500 سے زیادہ زخمی

copyright:

show related homepage:

Show on Homepage