Pse Ramiz Lladrovci kërkon lirimin e krerëve të UÇK-së?

DRENAS — Kryetari i Komunës së Drenasit, Ramiz Lladrovci, ka reaguar ndaj shtyrjes së shpalljes së vendimit në procesin gjyqësor kundër ish-udhëheqësve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit, duke deklaruar se "vetëm vendimi lirues është i drejtë për çlirimtarët".

Në një postim në Facebook, Lladrovci ka theksuar se shtyrja e afatit të vendimit nga maji dhe korriku në shtator është një argument se vendimi duhet të jetë lirues. "Heronjtë tanë të luftës dhe paqes, Hashimin, Kadriun, Jakupin e Rexhën, i presim fitimtarë nga beteja e fundit për Republikën e Kosovës dhe pastërtinë e luftës së UÇK-së," shkroi ai.

Lladrovci ka shprehur besim të pakufishëm ndaj aleatëve dhe drejtësisë ndërkombëtare, duke argumentuar se betejat e luftës u fituan me gjakun e dëshmorëve, ndërsa fitorja diplomatike u arrit me mbi 120 njohje të Kosovës. "Retë e zeza mbi Kosovën, njëzet vjet pas çlirimit, i ranë barrë ti heq Hashimi me shokë," shtoi ai.

Kryetari i Drenasit ka vlerësuar fisnikërinë, virtytin dhe guximin e liderëve të UÇK-së, duke i quajtur ata "heronj të luftës dhe paqes" që janë gati të sakrifikojnë gjithçka për të ardhmen e popullit. "Jemi me fat se kemi liderë të tillë," shkroi Lladrovci, duke i pritur të lirë në "Kosovën e lirë, të lirë e krenar".

Burim: Gazeta Express — Redaksia ZHURMA