Pse Supremja refuzoi rinumërimin e votave të PDK-së?

PRISHTINË — Gjykata Supreme e Kosovës ka refuzuar ankesën e Qëndrim Kryeziut, kandidat për deputet nga Partia Demokratike e Kosovës (PDK), për rinumërimin e votave preferenciale të partisë në nivel vendi.

Në vendimin e saj, Gjykata vlerësoi se Paneli Zgjedhor për Ankesa dhe Parashtresa (PZAP) kishte vepruar drejt kur refuzoi kërkesën, pasi nuk u paraqitën prova të mjaftueshme për shkeljet e pretenduara. Kryeziu kishte argumentuar se rinumërimi i mëparshëm i urdhëruar nga Komisioni Qendror i Zgjedhjeve zbuloi pasaktësi në numërimin fillestar të votave në qendrat komunale.

Megjithatë, Supremja konstatoi se pretendimet e Kryeziut nuk mbështeteshin në prova bindëse dhe se nuk kishte shkelje procedurale që do të ndikonin në ligjshmërinë e procesit. Vendimi i PZAP-it mbetet në fuqi, ndërsa ankesa e kandidatit të PDK-së u refuzua si e pabazuar.

Burim: Telegrafi — Redaksia ZHURMA