Si do të lëvizë moti në Kosovë deri në fundjavë?

PRISHTINË — Kushtet e paqëndrueshme do të vazhdojnë në Kosovë gjatë kësaj jave, ndërsa Evropa Perëndimore përballet me valën e dytë të nxehtësisë me temperatura deri në 40°C në Spanjë dhe Francë.

Dita e hënë karakterizohet me diell dhe vranësira të pakta, por vonë pasdite priten reshje të izoluara shiu në zonën veriore dhe verilindore. Këto reshje vijnë si pasojë e një mase të ftohtë dhe të lagësht që shtrihet përgjatë Evropës Qendrore, duke u afruar deri në kufirin me Kosovën.

Dita e martë sjell rrebeshe lokale shiu gjatë pasdites, me mundësi për breshër në zona të caktuara dhe shkarkesa rrufesh. Të mërkurën, një ajër i freskët do të depërtojë me rrebeshe, rrufe dhe breshër të vogël — kushte që në zona të caktuara do të jenë në formë të shtrëngatave apo furtunave kalimtare. Të enjten vazhdon i njëjti ritm: diell, vranësira dhe rrebeshe lokale.

Nga e premtja dhe në fundjavë moti kthehet kryesisht me diell dhe më i nxehtë. Temperaturat minimale do të lëvizin nga 11 deri në 17°C, ndërsa ato maksimale nga 25 deri në 32°C. Era do të fryjë nga veriu me shpejtësi 20–70 km/h, duke arritur kategorinë stuhi e lehtë gjatë zhvillimeve konvektive.

Burim: Gazeta Express — Redaksia ZHURMA