Maqedonia i bashkohet EU4Health më 24 qershor

SHKUP — Ministri i Shëndetësisë, Azir Aliu, njoftoi se Maqedonia e Veriut do t'i bashkohet programit EU4Health më 24 qershor në Bruksel, një vit pas marrjes së detyrës. Sipas tij, ky hap do të jetë "konfirmimi më i fuqishëm se reformat e brendshme po marrin një kornizë evropiane".

EU4Health është programi më i madh shëndetësor i Bashkimit Evropian, me buxhet operacional prej 4.4 miliardë eurosh për periudhën 2021–2027. Anëtarësimi i jep shtetit mundësinë të marrë pjesë në thirrje, grante, prokurime publike dhe partneritete evropiane.

Aliu theksoi se vlera kryesore nuk qëndron vetëm te fondet, por te standardet, njohuritë dhe rrjetet evropiane. Programi hap mundësi për projekte në shëndetësinë digjitale, European Health Data Space, parandalimin, skriningun, shëndetin mendor, gatishmërinë ndaj krizave dhe qasjen në barna.

"Nëse viti i parë i mandatit ishte vit i vendosjes së drejtimit, viti i dytë do të jetë vit i shfrytëzimit të mundësive të EU4Health", tha ministri. Ai shtoi se pas anëtarësimit, detyra është të ndërtohen kapacitete operative dhe të përgatiten aplikime konkrete për projekte.

Aliu sqaroi se pandemia tregoi se asnjë shtet nuk mund të përballet i vetëm me rreziqet shëndetësore, duke e cilësuar EU4Health një hap të rëndësishëm drejt sigurisë shëndetësore përmes solidaritetit evropian.

Burim: Tetova Sot — Redaksia ZHURMA