Кырлайда Тукай укулары

Милләт җанлы һәр татар күңеле өчен Яз һәм Тукай сүзләре гел янәшә йөри. Милләтебезнең йөз аклыгы булган бөек шәхесебез – Габдулла Тукай туган көнне Татарстан һәм дөньяның төрле кыйтгаларына сибелеп яшәгән татар халкы Туган тел көне, Шигърият бәйрәме буларак зурлап билгеләп үтә. Бу көннәрдә бөек шагыйребезнең туган ягы – Арча төбәге аеруча гөрли. Менә быел да Яңа Кырлай авылы республикабызның төрле почмакларыннан килгән кунакларны кабул итте. Биредә ел саен «Без – Тукайлы халык» дип исемләнгән республикакүләм Габдулла Тукай укулары үтә.