Kush u plagos në përleshjen e armatosur në Llap?

PODUJEVË — Një përleshje e armatosur në qendër të Llapit këtë pasdite ka kulminuar me plagosjen e disa personave, duke u cilësuar nga Prokuroria Themelore e Prishtinës si një rast i "Vrasjes së rëndë në tentativë".

Sipas konfirmimeve, të përfshirët në këtë ngjarje janë Fidaim Zejnullahu, Fatlum Zejnullahu, Agim Xhemaji, si dhe Argjend Islami, i cili ishte kalimtar i rastit. Sipas të dhënave të mbledhura, nipat e përfshirë në konflikt janë mërgimtarë.

Hetimet fillestare tregojnë se motivi i këtij sulmi dyshohet të jetë një mosmarrëveshje e mëhershme mes dajës dhe nipërve. Të plagosurit janë dërguar menjëherë në Qendrën Klinike Universitare të Kosovës (QKUK) për të marrë trajtimin e nevojshëm mjekësor.

Prokuroria po heton rastin sipas nenit 173, lidhur me nenin 28 të Kodit Penal të Republikës së Kosovës. Në koordinim me Policinë e Kosovës, po ndërmerren veprimet hetimore për sqarimin e plotë të rrethanave të kësaj ngjarjeje, ndërkohë që sulmet me armë në Podujevë mbeten një shqetësim i vazhdueshëm.

Burim: Klan Kosova — Redaksia ZHURMA