Pse shqetëson heshtja e Qeverisë për gazin amerikan?

PRISHTINË — Eksperti i energjetikës Vezir Rexhepi ka shprehur shqetësim për heshtjen e Qeverisë ndaj projektit të gazit amerikan, duke thënë se asnjë qeveri deri më tani nuk ka ftuar ekspertë kompetentë për analiza energjetike. Deklaratat i bëri në emisionin "Konfront" në KTV.

Rexhepi tha se nuk dihet nëse Qeveria po e diskuton projektin me ekspertë të energjisë, ekonomisë dhe ambientit. "E shoh që ka një heshtje dhe ende nuk po shoh një miratim të plotë. Kjo është shqetësuese", tha ai.

Eksperti potencoi se "Ne e kemi aleat të padiskutueshëm Amerikën dhe nuk guxojmë të ikim nga objektiva strategjike dhe amerikane." Ai shtoi se Kosova nuk humb asgjë nëse i bashkohet projektit të gazit, të cilin e cilësoi si "shumë strategjik për shtetin e Kosovës."

Ndërkohë, Kosova ka refuzuar të investojë rreth 200 milionë dollarë në infrastrukturën e gazit përmes programit MCC dhe i ka devijuar fondet në sisteme të ruajtjes së energjisë me bateri. Odat ekonomike të Kosovës kanë paralajmëruar se refuzimi i gazit amerikan mund të ndikojë negativisht në partneritetin me SHBA-në.

Burim: Gazeta Express — Redaksia ZHURMA