{
  "$type": "site.standard.document",
  "bskyPostRef": {
    "cid": "bafyreieipbfe7hyyoziijlyjapcmx5klfrjruwyx2nlr2na6jt7d7qjusm",
    "uri": "at://did:plc:wib47ggfushco6az6mwbz77k/app.bsky.feed.post/3mp22nvpmj4k2"
  },
  "coverImage": {
    "$type": "blob",
    "ref": {
      "$link": "bafkreigmcwwxvv25tyiieoh6gwxbjfr346hqkklhaijoyxv2p4cec4plia"
    },
    "mimeType": "image/jpeg",
    "size": 215063
  },
  "description": "Pse pesë kombëtare i dhanë lamtumirën turneut pas dy humbjeve të para?",
  "path": "/kush-u-eliminua-matematikisht-kupa-botes-2026/",
  "publishedAt": "2026-06-24T13:50:11.000Z",
  "site": "https://zhurma.press",
  "tags": [
    "Klan Kosova",
    "https://klankosova.tv/kush-u-eliminua-deri-tash-nga-kupa-e-botes/"
  ],
  "textContent": "PRISHTINË — Pesë kombëtare i kanë dhënë lamtumirën Kupës së Botës 2026, eliminuar matematikisht pas dy humbjeve në fazën e grupeve. Nga 48 kombëtare pjesëmarrëse në Botërorin e këtij viti, 16 do të eliminohen në përfundim të fazës së grupeve, e cila mbyllet në orët e para të mëngjesit të së dielës sipas orës britanike. Ndërsa gara po hyn në momentet vendimtare, disa skuadra tashmë i kanë dhënë lamtumirën turneut.\n\nNë Grupin C, Haiti nuk ka më mundësi për të avancuar pas humbjeve ndaj Skocisë dhe Brazilit. Për haitianët, kjo shënon fundin e një aventure historike, pasi po merrnin pjesë në Kupën e Botës për herë të parë që nga viti 1974, pra pas 52 vitesh.\n\nTurqia është bërë kombëtarja e parë evropiane që eliminohet nga Botërori 2026. Humbjet ndaj Australisë dhe Paraguait i kanë mbyllur çdo rrugë kualifikimi skuadrës turke. Nga Afrika, Tunizia është e vetmja e konfirmuar për eliminim, me dy disfata të rënda duke u mposhtur me nga katër gola diferencë nga Suedia dhe Japonia.\n\nJordania, debutuese në këtë edicion të Kupës së Botës, u bë kombëtarja e parë aziatike e eliminuar matematikisht, duke u mposhtur në dy ndeshjet e para. Ndërkohë, në Grupin L ku bën pjesë edhe Anglia, Panamaja është skuadra e pestë që largohet nga gara. Ajo u mposht 1-0 nga Gana dhe më pas nga Kroacia, duke mbetur pa pikë pas dy xhirove të para.\n\nFormati i ri i Kupës së Botës 2026 ka sjellë ndryshime të rëndësishme në kriteret e renditjes. Në rast se dy ose më shumë skuadra e mbyllin fazën e grupeve me numër të barabartë pikësh, përparësi nuk do të ketë më diferenca e golave, por rezultatet në përballjet direkte mes ekipeve të përfshira.\n\n_Burim:_ Klan Kosova_,_ https://klankosova.tv/kush-u-eliminua-deri-tash-nga-kupa-e-botes/\n_— Redaksia ZHURMA_",
  "title": "Kush u eliminua matematikisht nga Kupa e Botës 2026?",
  "updatedAt": "2026-06-24T13:50:12.262Z"
}