Si po e mban Selvija premtimin për këngët e Shpat Kasapit?

SHKUP — Bashkëshortja e këngëtarit të ndjerë Shpat Kasapi, Selvija, ka mbajtur premtimin e saj të dhënë pak ditë më parë duke publikuar një tjetër këngë të papublikuar të artistit. Projekti i ri muzikor i titulluar "Nana" sapo ka parë dritën e publikimit në platformën YouTube.

Kjo nismë vjen për të sjellë para publikut materialet muzikore që artisti i dashur nuk arriti t'i finalizonte dhe t'i prezantonte gjatë jetës së tij. Vdekja e tij e hershme la shumë projekte të papërfunduara, por zëri i tij po rikthehet përsëri për admiruesit e shumtë.

Publikimi i ri i këngës është pritur me emocione mjaft të forta nga admiruesit e shumtë të Shpat Kasapit, të cilët patën rastin të dëgjojnë edhe një herë zërin e tij. Ky publikim shoqërohet gjithashtu me një videoklip mjaft prekës, ku artisti shfaqet në mënyrë simbolike me krahë engjëlli pranë nënës së tij.

Kënga e re "Nana" nuk pritet të jetë projekti i fundit që do të publikohet. Bashkëshortja e tij, Selvija, ka shprehur hapur dëshirën për të vazhduar ndarjen e krijimeve muzikore të lëna pas nga këngëtari, në mënyrë që muzika dhe kujtimi i tij të mbeten gjithmonë të gjalla.

Burim: Zëri — Redaksia ZHURMA