Pse u përplasën Ziadin Sela dhe Bekim Qoku për gjuhën shqipe?

SHKUP — Kryetari i Lidhjes Shqiptare, Ziadin Sela, ka bërë thirrje për unifikim të qëndrimeve të partive politike shqiptare në Maqedoninë e Veriut për ta bërë të barabartë gjuhën shqipe. Sela theksoi se megjithëse ekziston Ligji për përdorimin e gjuhëve, ai ende nuk po zbatohet siç duhet në praktikë.

Sela argumentoi se gjuha shqipe në vend ka mbetur peng i përqindjeve të numrave dhe bëri një krahasim me Kosovën. Sipas tij, komuniteti serb në Kosovë, i cili përbën vetëm 4 për qind të popullsisë totale, gëzon të drejta të plota kushtetuese për përdorimin zyrtar të gjuhës së tij.

Kësaj deklarate i është përgjigjur me kritika të ashpra deputeti i koalicionit VLEN, Bekim Qoku. Ai deklaroi se opozita mban përgjegjësi të plotë pasi për 22 vite me radhë kishte të gjithë pushtetin në dorë dhe dështoi t'i zgjidhte këto çështje jetike për shqiptarët e Maqedonisë.

Qoku rikujtoi se opozita fitoi 7 mandate me premtimin për zyrtarizimin e shqipes, por pyeti se pse gjuha nuk u zbatua në uniforma, gjykata e monedha. Ai shtoi se ata e zyrtarizuan gjuhën 6 herë brenda këtyre mandateve, por pa sjellë ndonjë ndryshim konkret për qytetarët në terren.

Burim: TV21 — Redaksia ZHURMA