Si po garantohet aksesi i lirë në plazhet publike të Kavajës?

KAVAJË — Me nisjen e sezonit turistik veror, ministri i Turizmit, Kulturës dhe Sportit, Blendi Gonxhja, zhvilloi inspektime në terren në plazhet publike të Kavajës dhe diskutoi me qytetarë e banorë mbi zbatimin e rregullores për plazhet publike dhe garantimin e të drejtës së çdonjërit për akses të lirë e të barabartë në bregdet.

Gonxhja theksoi angazhimin për mbrojtjen e hapësirave publike, respektimin e të drejtave të banorëve që jetojnë pranë këtyre zonave, si dhe krijimin e kushteve që plazhet të jenë të pastra, të sigurta dhe në funksion të interesit publik.

Inspektimet në vijën bregdetare janë pjesë e masave të ndërmarra për sezonin veror, me qëllim garantimin e një menaxhimi më të mirë të hapësirave publike. Në fokus mbetet bashkëpunimi me njësitë vendore dhe komunitetet lokale, për të garantuar plazhe të aksesueshme, të pastra dhe të sigurta gjatë gjithë periudhës së verës — duke u shërbyer njësoj banorëve dhe vizitorëve vendas e të huaj.

Burim: ATSH — Redaksia ZHURMA