Gjykata Kushtetuese heq emrat shqiptarë nga rrugët e Tetovës

SHKUP — Gjykata Kushtetuese e Maqedonisë së Veriut ka shfuqizuar vendimin e vitit 2007, me të cilin 11 rrugë dhe një shesh në Tetovë morën emra të figurave dhe ngjarjeve shqiptare. Vendimi u miratua me pesë vota pro; kundër votuan dy gjyqtarët shqiptarë dhe gjyqtari nga komuniteti turk.

Procedura u iniciua nga Lidhja e Luftëtarëve nga Lufta Nacionalçlirimtare dhe Antifashiste e Maqedonisë 1941–1945, që argumentoi se ndryshimi ishte bërë pa pëlqimin e Qeverisë dhe në kundërshtim me ligjin. Me vendimin shfuqizohen emërtimet "Iliria", "Dervish Cara", "Mehmet Pashë Deralla", "Kongresi i Manastirit", "Dëshmorët e Kombit", "Abdyl Frashëri", "Sami Frashëri" dhe të tjerë.

Në vend të tyre rikthehen emra nga periudha jugosllave: "Marshall Tito", "JNA", "Lenin", "Ivo Lola Ribar", "Radovan Coniq" dhe të tjerë. Sipas informacioneve të publikuara, emrat e miratuar para 19 vitesh ishin vendosur kryesisht në tabelat e rrugëve, por nuk ishin reflektuar në dokumentacionin zyrtar.

Iniciatori i lëndës, Darijan Sotirovski, e përshëndeti vendimin si "fundin e emrave të imponuar dhe të paligjshëm". Opozita shqiptare reagoi ashpër. BDI e cilësoi "kthim prapa" që rrezikon barazinë ndëretnike. Albi Qamili, zëvendëskryetari i Tetovës, akuzoi BDI-në dhe Gjykatën për bashkëveprim politik, por paralajmëroi zgjidhje të re përmes Komisionit për Riemërtimin e Rrugëve.

Vendimi vjen pas protestave për provimet e gjuhës shqipe dhe ka shkaktuar pakënaqësi të gjerë. Qamili tha se zgjidhja e re do të synojë emërtime të qëndrueshme ligjërisht, në përputhje me realitetin shoqëror të Tetovës.

Burim: Gazeta Express_, https://www.gazetaexpress.com/maqedoni-e-veriut-gjykata-heq-11-emra-shqiptare-nga-rruget-e-tetoves-rikthehen-emertimet-jugosllave/ — Redaksia ZHURMA_