Pse dy oda ekonomike bëjnë thirrje urgjente për gazin amerikan?

PRISHTINË — Oda Ekonomike Amerikane në Kosovë (OEAK) dhe Oda Ekonomike e Kosovës (OEK) kanë lëshuar komunikata të forta ditën e mërkurë, duke kërkuar nga institucionet e Kosovës të angazhohen në projektet rajonale të gazit të lëngshëm natyror (LNG) të mbështetura nga Shtetet e Bashkuara të Amerikës.

Të dyja odat paralajmërojnë se mungesa e përfshirjes së Kosovës rrezikon të lërë vendin jashtë një kornize strategjike rajonale që po përcakton të ardhmen e sigurisë energjetike në Evropën Juglindore.

OEAK shprehu "shqetësim serioz" për mungesën e konsideratës nga Qeveria në detyrë ndaj thirrjeve të përsëritura të Qeverisë amerikane. "S'duhet ta humbim këtë mundësi," theksoi Oda Amerikane, duke vlerësuar se partneriteti strategjik me SHBA-në mbetet një nga asetet më të rëndësishme kombëtare të vendit.

OEK, nga ana tjetër, bëri thirrje për "veprime urgjente", duke paralajmëruar se refuzimi ose mosangazhimi mund të ndikojë negativisht në partneritetin strategjik me SHBA-në dhe të kufizojë mundësitë për investime të reja strategjike.

Të dyja komunikatat theksojnë të njëjtin fakt: të gjitha shtetet e tjera të Ballkanit Perëndimor kanë shprehur zotimin për t'u bërë pjesë e infrastrukturës rajonale të LNG-së. Kosova mbetet e vetmja jashtë.

Kjo nuk është hera e parë që OEK kërkon veprim. Oda rikujton se ka kërkuar edhe më herët urgjencë në diversifikimin e burimeve të energjisë, ndërsa vendi vazhdon të mbetet i varur nga kapacitetet e vjetruara gjeneruese dhe importet e mëdha të energjisë elektrike.

Çështja e gazit amerikan në Kosovë ka marrë vëmendje edhe më parë në analizat e ekspertit Luan Shllaku si dhe profesorit Vezir Rexhepi, të cilët e kanë vlerësuar si projekt strategjik për vendin. Të dytë e bëjnë thirrjen e sotme të odave një presion të ri mbi qeverinë e ardhshme.

Burim: Telegrafi_, https://telegrafi.com/gazi-amerikan-cfare-thone-nga-oda-ekonomike-amerikane-dhe-oda-ekonomike-e-kosoves/ — Redaksia ZHURMA_