Pse Gashi e quan "mungesë sistemi" aksidentet në autostradë?

PRISHTINË — Deputeti Arben Gashi nga Lidhja Demokratike e Kosovës ka reaguar pas debatit të mbrëmshëm mes kryetarit të Prishtinës, Përparim Rama, dhe përfaqësuesve të pushtetit qendror për aksidentet në autostradë. Gashi refuzon ta trajtojë çështjen si retorikë politike.

"Kur qytetarët vdesin në rrugë, nuk është 'rastësi'. Kur ndodhin aksidente të përsëritura, nuk është 'fat i keq'", shkruan ai. Sipas tij, fajin e mban "mungesa e sistemit: mungesë e kontrollit, mungesë e standardeve, mungesë e zbatimit të ligjit dhe, mbi të gjitha, mungesë e përgjegjësisë institucionale".

Gashi e akuzon shtetin se "fshihet pas deklaratave" dhe sillet "si komentues i tragjedive" në vend që të veprojë. Ai thekson se roli i institucioneve është "parandalim, kontroll, ndëshkim dhe garantim i sigurisë". Kur këto dështojnë, shtron ai, "nuk kemi thjesht problem teknik, kemi dështim politik dhe institucional".

Deputeti i LDK-së e mbyll me një kornizë të qartë: "Ky është momenti për seriozitet, jo për justifikime. Për përgjegjësi, jo për alibi. Për veprim, jo për propagandë." Matja e vërtetë e shtetit, sipas tij, "nuk është sa flet për qytetarët e vet, por sa i mbron ata".

Debati Rama–VV erdhi pas një serie aksidentesh të rënda në autostradën "Ibrahim Rugova", ku një grua humbi jetën nga rrëshqitja e dheut.

Burim: Demokracia — Redaksia ZHURMA