Si e kundërshton Snopçe Qokun për dorëheqjen e deputetëve?

SHKUP — Deputeti i ASH-së, Halil Snopçe, ka reaguar ashpër ndaj kërkesës së deputetit Bekim Qoku që ai të dorëzojë mandatin e deputetit, gjatë debatit për Ligjin për Përfaqësim të Drejtë dhe Adekuat.

Snopçe e ka cilësuar argumentimin e Qokut si një "tragjikomedi". "Fatkeqësia në këtë tragjikomedi është se pjesa tragjike nuk bie mbi ata që e kanë propozuar ligjin, por mbi qytetarët që do të përballen me pasojat e tij", ka deklaruar ai.

Ai ka shtuar se pjesa komike i mbetet VLEN-it dhe vetë Qokut, "të cilët po bëhen gjithnjë e më shumë objekt i talljes publike për shkak të justifikimeve që ofrojnë". Snopçe ka vlerësuar se Qoku "po humb sensin politik" dhe për këtë arsye "shpeshherë paraqitet qesharak në qëndrimet e tij publike".

Snopçe ka rikujtuar se Bekim Qoku është zgjedhur deputet në Zonën Zgjedhore numër 6 falë votave të qytetarëve shqiptarë nga Tetova, Gostivari, Vrapçishti dhe vendbanime të tjera. "Paradoksi është se sot ai u kërkon përfaqësuesve të këtyre qytetarëve të dorëzojnë mandatet e tyre. Pikërisht kjo e bën qëndrimin e tij jo vetëm kontradiktor, por edhe qesharak", ka theksuar ai.

Burim: Tetova Sot — Redaksia ZHURMA