Pse kërkon Demokraci Plus anulimin e tenderit 480 mijë euro të MMPH-së?

PRISHTINË — Demokraci Plus (D+) i ka kërkuar Ministrisë së Mjedisit dhe Planifikimit Hapësinor (MMPH) të anulojë një procedurë prokurimi prej 480,000 euro, e cila parashikon angazhimin e 20 ekspertëve përmes Marrëveshjeve për Shërbime të Veçanta (MShV), të njohura si "kontrata mbi vepër".

Sipas organizatës, kjo procedurë nuk i përmbush kriteret ligjore. Detyrat e parashikuara — administrim dokumentacioni, koordinim institucional, organizim takimesh, hartim raportesh, komunikim publik dhe mbështetje teknike-administrative — janë funksione të përditshme administrative, jo shërbime të specializuara që kërkojnë kontraktim të jashtëm. D+ vlerëson se këto duhet të mbulohen përmes rekrutimit sipas Ligjit për Zyrtarët Publikë.

Organizata i referohet Rregullores Nr. 002/2024 për Prokurimin Publik, e cila përcakton se kontraktorët individualë mund të angazhohen vetëm për ekspertizë specifike që nuk mund të sigurohet përmes procedurave të rregullta të administratës publike. D+ paralajmëron se përdorimi i MShV-ve rrezikon të zëvendësojë punësimin e rregullt në administratë.

Burim: Telegrafi — Redaksia ZHURMA