Pse Shqipëria po tërheq gjithnjë e më shumë turistë italianë?

TIRANË — Shqipëria po shndërrohet në një nga destinacionet më të kërkuara për pushuesit italianë, të cilët udhëtojnë me traget nga Bari për rreetë gjashtë orë e gjysmë. Sipas një shkrimi të medias italiane “CoratoLive.it”, vendi ofron plazhe të mrekullueshme mesdhetare, qendra historike të periudhës osmane dhe peizazhe malore mahnitëse.

Për vizitorët që kërkojnë pushime me buxhet të arsyeshëm, Shqipëria paraqitet si një alternativë që meriton vëmendje të shtuar. Një turist me buxhet mesatar mund të llogarisë një shpenzim ditor mes 50 dhe 90 eurove për akomodim në hotel të mirë, restorante dhe vizita në pika kryesore.

Sektori i gastronomisë lokale mbetet jashtëzakonisht konkurrues në krahasim me standardet evropiane. Një vakt i plotë në një restorant lokal kushton vetëm 10 deri në 15 euro për person. Vizitorët këshillohen gjithashtu të provojnë verërat shqiptare, të cilat ofrojnë cilësi të mirë me çmime shumë të ulëta.

Megjithatë, pushuesit duhet të marrin disa masa praktike para nisjes drejt bregdetit. Vendi përdor monedhën e tij, lekun, ndaj këshillohet këmbimi paraprak i valutës. Rezervimet e hershme mbeten zgjedhja më e mirë, pasi çmimet e akomodimeve rriten ndjeshëm gjatë pikut të sezonit në muajt korrik dhe gusht.

Një aspekt tjetër që shpesh surprizon turistët italianë lidhet me telefoninë celulare dhe internetin. Shqipëria nuk është pjesë e Bashkimit Evropian, çka do të thotë se rregullat e roaming-ut nuk zbatohen. Përdorimi i kartave celulare italiane mund të jetë i kushtueshëm, ndaj këshillohet blerja e paketave shtesë.

Përveç Rivierës që ofron ujëra të kristalta, vizitorët po eksplorojnë qytete historike si Berati i mbrojtur nga UNESCO, me kalanë e tij të lashtë. Ndërkohë, Tirana po transformohet shpejt në metropol me restorante e muze si Bunk'Art, ku bunkerët e epokës komuniste ndërthurin historinë me artin bashkëkohor.

Ky interes i lartë tregon se ndjesia e autenticitetit që Shqipëria ruajti gjatë viteve kur ishte më pak e vizituar, po shndërrohet në një motor të fuqishëm për zhvillimin e saj turistik.

Burim: ATSH — Redaksia ZHURMA