Çfarë kërkon Toni Gogu në Berlin pas miratimit të IBAR-it?

BERLIN — Ministri i Drejtësisë, Toni Gogu, zhvilloi takime zyrtare në Gjermani me zyrtarë të lartë federalë. Takimet me ministrin e Shtetit, Gunther Krichbaum, dhe Sekretaren Parlamentare të Shtetit, Annette Kramme, u përqendruan te hapat e mëtejshëm pas miratimit të IBAR-it për Shqipërinë.

Miratimi i IBAR-it nga partnerët evropianë konfirmon progresin e Shqipërisë dhe i hap rrugën fazës së mbylljes për Kapitullin 23. Ministri Gogu theksoi se ky vlerësim nuk trajtohet si kurorëzim i punës, por si një autorizim për të vazhduar me fazën më kërkuese të negociatave.

Nga ana e tij, Gunther Krichbaum konfirmoi se mbështetja gjermane mbetet e palëkundur, me kusht që integrimi të bazohet në rezultate të verifikueshme. Sipas tij, pavarësia e gjyqësorit, lufta ndaj korrupsionit dhe efikasiteti i institucioneve të reja mbeten kriteret kryesore të vlerësimit.

Në këtë angazhim, Ministria e Drejtësisë ka tre prioritete kryesore: aksesin në drejtësi, efiçencën e sistemit dhe mbrojtjen e të drejtave procedurale. Si shembull konkret të tranzicionit u vlerësua ulja e ndjeshme e stokut të çështjeve të pazgjidhura në Gjykatën e Lartë.

Gjatë takimit me Annette Kramme u diskutua për thellimin e partneritetit me Fondacionin Gjerman për Bashkëpunim Juridik Ndërkombëtar, i cili ka një histori bashkëpunimi prej dy dekadash. Diskutimi po kalon nga mbështetja e reformave te bashkëpunimi për mbylljen e kapitujve, dixhitalizimi i drejtësisë dhe luftimi i krimit përmes Eurojust.

Në mbyllje, ministri Gogu nënvizoi se suksesi i reformës do të matet me besimin e qytetarëve te drejtësia dhe jo thjesht me numrin e institucioneve të krijuara. Ndërkohë, vizita e delegacionit shqiptar në Berlin do të vijojë me takime të tjera me përfaqësues të Bundestagut.

Burim: ATSH — Redaksia ZHURMA