Pse LDK e konsideron ZRrE-në pjesë të skandaleve në energjetikë?

PRISHTINË — Sektori i energjisë në Kosovë po përballet me skandale të njëpasnjëshme financiare, faturën e të cilave po e paguajnë qytetarët. Kandidatja për deputete e LDK-së, Janina Ymeri, ka akuzuar Zyrën e Rregullatorit për Energji si palë të inkriminuar në këto skema abuzive tregtare.

Ajo sqaroi se, pas publikimit të skandaleve që arritën deri në Bruksel, çmimi i bartjes ndërkufitare të energjisë pësoi rënie drastike prej mbi 30%. Kjo vlerë ka rënë nga 7.5 milionë në 2.5 milionë euro, gjë që lidhet drejtpërdrejt me hetimet e nisura në rajon.

Ymeri shtoi se rrugët rajonale tregtare janë pjesë e tregut ndërkombëtar dhe nuk mund të injorohen nga ZRrE-ja. Ajo përmendi shembullin e Rumanisë, ku kompania EFT e Vuk Hamoviqit u dënua, duke paralajmëruar se vëmendja e shtuar ndërkombëtare mund të sjellë sanksione të ngjashme edhe në Kosovë.

Sipas kandidates, në vitin 2024 çmimi i bartjes për kufijtë me Malin e Zi dhe Maqedoninë e Veriut ishte më i ulët, por në 2025-ën u ngrit me miratimin e ZRrE-së. Vetëm pas hetimeve dhe debatit publik çmimet ranë përsëri, duke parandaluar pagesa mbi 800 euro për megavat.

Përveç kësaj, raportet e vitit 2025 tregojnë se Kosova paguan deri në 140 euro për megavat për importin e energjisë. Kjo ndodh ndërsa KEDS-i e blen atë nga KEK-u për vetëm 29.5 euro, duke ngritur hije dyshimi mbi kontrollin e tregut kosovar të energjisë.

Ymeri theksoi se edhe kur çmimi në bursa ishte 101 deri në 108 euro, vendi ynë pagoi 140 euro për megavat. Ajo kërkoi ndaljen e menjëhershme të kësaj tregtie që dëmton qytetarët, duke insistuar në uljen e çmimeve dhe ndaljen e pazareve ditore me energjinë.

Burim: Ekonomia Online — Redaksia ZHURMA