Pesë të ndaluar për dhunë në familje brenda 24 orëve në Maqedoni

SHKUP — Ministria e Punëve të Brendshme e Maqedonisë së Veriut ka njoftuar se gjatë 24 orëve të fundit janë regjistruar gjashtë kallëzime për dhunë në familje, të cilat kanë çuar në ndalimin e pesë personave. Policia po ndërmerr të gjitha masat e nevojshme për zbardhjen e plotë të këtyre rasteve të dhunës fizike dhe psikologjike.

Në Strumicë u arrestua një 59-vjeçare që sulmoi nusen dhe nipin e saj të mitur, ndërsa në Gostivar u ndalua 53-vjeçari Q.I., i cili sulmoi djalin e tij dhe e kërcënoi atë së bashku me të ëmën me një mjet të mprehtë. Po ashtu, në Manastir u prangos 35-vjeçari I.P. për dhunë ndaj bashkëshortes.

Një rast tjetër u regjistrua në Veles, ku 28-vjeçari B.S. shkeli urdhrin e mbrojtjes duke kërcënuar prindërit e tij dhe duke dëmtuar orenditë. Ndërkohë, në Kumanovë u arrestua 39-vjeçari D.N., i cili akuzohet për keqtrajtim fizik dhe psikologjik të vazhdueshëm ndaj nënës së tij 62-vjeçare në shtëpinë e tyre familjare.

Së fundmi, në rrethin e Shkupit, një 41-vjeçare ka denoncuar se është sulmuar fizikisht nga bashkëshorti i saj A.A. Pas dokumentimit të plotë të të gjitha këtyre rasteve nga ana e organeve të rendit, ndaj të dyshuarve do të ngrihen kallëzimet përkatëse penale në bashkëpunim me prokuroritë përkatëse.

Burim: Telegrafi — Redaksia ZHURMA