Муса Җәлилнең култамгалы китабы

Вакыт агышын 60 елга чигереп, студент елларыннан башлыйм. 1958 елда Казан дәүләт педагогика институтының тарих-филология факультетына укырга кергәч, кодаларда – Гөлсем апа белән Гыйльметдин абый Мөхетдиновларда яшәдем. Студент буларак, ярыйсы гына «акыл» туплаганмындыр, күрәсең, сөйләшеп утырганда, әңгәмәгә урынлы сораулар белән кушыла башлагач, Гыйльметдин абый китапханәсендә сакланган кечкенә генә бер китап күрсәтте. Ул Муса Җәлилнең Гыйльметдин абыйга автографы (култамгасы) белән бүләк иткән «Алтынчәч» китабы (җаваплы редакторы – Гази Гашшаф, тиражы – 3070 данә) иде. «Безнең сөекле политик җитәкчебез Мөхетдинов иптәшкә Опера театрындагы кайнар көннәр истәлеге. 15.VI.41. Муса Җәлил», – дип язылган анда.