{
  "$type": "site.standard.document",
  "bskyPostRef": {
    "cid": "bafyreiarhjwszqxjynjyhjtipvowd44h5chrqvj2cne7kqgw34bqoi55yi",
    "uri": "at://did:plc:qd35iwy5g3lkbp4ss4so5kl7/app.bsky.feed.post/3mpr67wda5dg2"
  },
  "path": "/node/9998",
  "publishedAt": "2026-07-03T16:00:00.000Z",
  "site": "https://belem.ru",
  "tags": [
    "Татарстан"
  ],
  "textContent": "Яңалыкка кагылышлы рәсем:\n\nТатарстан\n\nТатарстанда 2026 елда «Туган (татар) тел» предметы буенча бердәм республика имтиханын 79 чыгарылыш сыйныф укучысы тапшырды – бу узган ел белән чагыштырганда ике тапкырдан да күбрәк.\n\nУртача балл 84,56 тәшкил итә. Бу хакта бүген Казан федераль университетында (КФУ) үткәрелгән БДИны сайлаган укучылар һәм укытучылар белән очрашуда журналистларга ТР Мәгариф һәм фән министры Илсур Һадиуллин хәбәр итте.\n\nТатар теле буенча имтиханны сайлаган чыгарылыш сыйныф укучыларының иң күбесе Казанда яши – 58 кеше. Бу имтиханны шулай ук Яр Чаллы, Түбән Кама шәһәрләре, Азнакай, Актаныш, Арча, Әтнә, Балтач, Бөгелмә, Кайбыч, Кукмара, Мөслим, Яңа Чишмә, Нурлат һәм Балык Бистәсе районнары укучылары да тапшырды.\n\nМинистр сүзләренчә, Татарстанда туган телләрне өйрәнү, саклау һәм үстерү өчен барлык шартлар да тудырылган. «Гаиләдә телгә булган мөнәсәбәт тә мөһим. Ә мәктәп алга таба гаиләдә салынган мохитне, атмосфераны үстерүне тәэмин итә», – дип билгеләп үтте ул.",
  "title": "Татарстанда татар теле буенча имтихан тапшыручы чыгарылыш сыйныф укучыларының саны ике тапкыр арткан"
}