Alberto Pombo, de 'Aquí tamén se fala': "Emociónome porque a rapazada está vendo que o mundo se pode transformar desde unha aula"

"Estou moi feliz". Alberto Pombo, director do IES Rafael Dieste da Coruña e promotor da iniciativa 'Aquí tamén se fala' expresa a súa ledicia nada máis atender a chamada de 'Nós Diario'. O equipo de comunicación do Deportivo foi quen lle deu a noticia a primeira hora deste 23 de xuño. O club de fútbol da súa cidade é de Primeira e agora tamén, 'da Coruña'.