Травертин жапқан Алматы. Қала билігі қасбет әрлеу жұмысына 25 млрд теңге жұмсамақ

Былтыр жыл соңы таяғанда Алматы орталығындағы совет заманында тұрғызылған екі үйдің қасбетін қайта жөндеу жұмысы басталды. Күтпеген мезгілде басталуы (Жаңа жыл қарсаңында) және реконструкция ауқымы биыл түсінікті болды — Жамбыл мен Назарбаев көшелерінің қиылысындағы үйлер әкімдік Алматы орталығында қолға алған ең ауқымды қасбет жөндеу жұмысының бастамасы екен. Реконструкция қаладағы жүзден астам үйді қамтиды, оған 25 млрд теңге жұмсалады. Қасбет жаңалау тәсілін сәулетшілер сынға алғанымен, процесс басталып кетті. «Власть» Қазақстанның ең ірі шаһарындағы орталық келбетін өзгертетін реконструкция жайында баяндайды.